【收市閒情】每個散戶心裡面，都有過一隻330

https://hk.finance.appledaily.com/finance/realtime/article/20151027/54361295?fbclid=IwAR1qkJJh3ru2DI8aYazhYwCZt_w8JFXPUr_6dntobX-XSyE_et5R-AcMQH8

呢兩日好多人都話，每個男人心裡面，都有一個黃翠如；每個女人心裡面，亦有一個洪永成。咁對每個散戶來講，相信都曾經有過一隻330－思捷環球。

悲劇之所以為悲劇，係因為故事開首嘅第一章，你會睇到希望。
有啲股，有啲故事包裝，但有啲亂黎，佢又俾過甜頭你
但你中伏，一次，兩次，三次…
但總係莫名其妙地，會有人繼續相信

就如一代股王思捷，02年染藍，股價就扶搖直上。當時係03年5月，你會話，「幾蚊升到十幾蚊，夠數啦」你見邢李㷧都喺14.7元沽貨，你走，隨之而來係，你呻，因為，你見到佢已升到廿蚊。

然後邢李㷧又沽貨，你又會話，「今舖真係冇得升啦。」可惜，事實係殘酷，你發現，原來思捷係一隻，大股東越沽就越升嘅股票。

種種跡象都說服你，佢信得過，信佢啦，你唔想最後後悔。如是者，你開始變得盲目，廿幾蚊去到四十蚊，你買，「基金都係搶貨啦」；40蚊去到80蚊，你掃，「業績咁靚，有咩可能跌？」的而且確，隻股冇令你失望，03至08年期間，盈利由12億元翻四番至64億元。

不論隻股有咩好同唔好消息，總之佢就係會升（你覺得）！你開始失晒理智，竟然會走去相信，原來世上有一隻股，係唔識跌。殊不知，炒股同做人一樣，信任就係重傷的基礎。刑氏08年突然話，我唔撈啦，走啦，股價隨後暴跌，作為散戶，你除咗說成一粒粗口外，你吹得佢脹嗎？

不過要老散輸錢，多多少少總會唔忿氣。而唔甘心，正正就係最危險。後海嘯時代，股價跟市反彈，邢氏借機清貨。你見基金搶貨到額外加碼，「哼！今次仲唔係絕地反擊！」人哋刑氏人去股空，拍拍攞友走咗去，你一衝，就注定中伏。

然而，每一個散戶都曾經自視過高，佢跌十蚊，你會話「話晒都係股王，跌到去呢度夠皮啦」，再跌十蚊，「爛船都有三分釘，佢得嘅。」你不斷幫佢諗原因支持佢本質係好股。

好犯賤，擺明遇到一隻衰股，你總係唔知點解，會一次又一次俾機會。思捷到海嘯價，你以為見底，但原來有一個價，比海嘯價更一去冇回頭，叫沙士價。好笑係，2012年，有人同你講，「800蚊買到一手藍籌，抵到爆。」結果第二年，藍籌都冇埋。

思捷今年首季同店銷售升一成，噚日股價就反彈兩成。係好強勢呀，不過醒吓啦，只要散戶行過佢啲街舖，見到門口人影都唔多隻，

你苦笑

你流淚

本文題目《每個散戶心裡面，都有過一隻330》。當然，事實你可能未曾買過一股330，但炒股生涯流流長，總會諗起一兩隻股票，去取代330呢個數字。