新地樓神萬能Key式說話技巧

中環在線：新地樓神萬能Key式說話技巧

老唔一定懵董，已經63歲嘅新地（016）樓神雷霆噚日就完美演繹一種講完等於無講嘅說話技巧，證明薑越老越辣之餘，亦反映雷生長年袋定一堆萬能Key應付記者突襲。

呢期樓市熱話之一係新世界（017）鄭志剛搞嘅「大學畢業生上車盤」。噚日有人問雷霆點睇呢個計劃，雷生嘅回應方法係：「我都要研究佢個計劃係咪幫到大學生。如果真係幫到大學生，我哋遲啲考慮邊啲樓盤合適。呢個目標當然係好喇，我哋詳細都要睇睇計劃細節，同埋用咩形式。」

呢個「目標好、睇細節、會研究」嘅三步曲式回應，雖然都無乜實質內容，但至少比起其他發展商慣用「唔知道、唔講得、唔評論」三無式回應可取。佢呢種萬金油式答案，更加經常擋住好多政策問題。例如大家可以試吓將佢個答案換做林鄭首置上車盤、增建居屋，睇吓係咪一樣充滿空氣感呢。

李華華