致廿幾歲窮撚的你

致廿幾歲窮撚的你

你無資格講你好累，
因為你只能用拼搏去縮短你同其他人之間既差距。

你無資格去玩，
因為你玩既代價比其他人大。
人地一日可以玩4個鐘，生活仍然無礙；
你玩4個鐘，就浪費左4個鐘，呢4個鐘你可以返工，可以進修增值，換來更多錢，
而呢d 錢對你同你家人黎講太重要，你揹唔起呢4個鐘既代價。

你無資格學人有興趣，
興趣係有錢人既玩意，你無錢。
你只能用你可以投放落興趣既時間去賺錢。

你無資格得過且過咁過你既人生，
呢個係有錢人既專利，你無錢。
你唔好好計劃人生再緊貼而行，代價太大你受唔起。
有錢人玩到三十歲，屋企仲有生意物業留比佢；
你玩到三十歲，就無可能叫人請工作經驗又無，份人又hea，又老既你。

你無資格追夢想，
除非你既夢想即刻有錢賺。
有錢人用三五七年追夢想，失敗左仲有屋企比錢佢重頭再黎過；
你用三五七年追夢想，就無左三五七年時間搵錢，失去左既無得重頭再黎過。

「錢唔係萬能」同「錢買唔到快樂」呢種說話你無資格講，
有錢人先有資格講呢種說話。
因為佢地已經有錢，試過有錢既滋味；
你無錢，你連錢可以買得到定買唔到既野，你都無。

「唔好將錢放係第一位」你無資格咁諗。
就係因為家人、老婆仔女、未婚妻太重要，你先更加需要錢去比佢地富足。
佢地病，你無錢，點醫？
佢地想食好少少既野，你無錢，點買？
佢地想開心，你無錢，點玩？
想為佢地買個保障，整份危疾人壽基金，你無錢，點買？

唔好將貶低錢既重要性既句子當做至理明言，你無資格。
生存就係要錢。
你試下無錢點生存？做乞衣呀？你甘心咩？叫埋你家人老婆仔女未婚妻一齊乞食呀？
有錢人話「金錢唔係一切，我嘗試洗少d錢，令我反思到真正既快樂其實唔需要太多錢」，
咁講係因為佢未試過真正無錢既生活，未試過因為無錢而煩惱生活，未試過因為無錢而眼白白睇住松會流走，未試過因為無錢而失去，未試過因為無錢而人笑。
「真正既快樂其實唔需要太多錢」？
令小朋友開心既雪糕你無錢點買比佢？

唔好自殺，唔好做危機既野，你無資格。
你條命唔係你一個既，全家等你開飯，老婆仔女等你養，未婚妻等你娶。
有錢人走去死左，家人都唔會生活成問題，甚至仲有錢留比佢地添；
你死左，留低d 咩？回憶呀？衣服呀？食得架咩？你捨得你重要既人為你既死傷心之餘仲要為生活煩惱？

唔好借錢，你無資格。
你還唔起錢既代價比有錢人高。
你破左產，屋企靠晒你點生活？
你周身債，屋企人點幫你還？仲要累佢地比人滋擾。
你比人斬死左，仲衰。
有錢人，周身債，破左產，都仲有其他有錢親戚幫。你有無？有呀？人地肯理你嗎？

唔好發家人、老婆仔女、未婚妻脾氣。
今次你有資格，因為你辛苦，但唔好。
因為佢地曾經對你充滿期望，但你今日咁既樣，佢地都肯陪你捱。
特別係你老婆或未婚妻，佢本來可以搵第二個，但佢選擇左你。

你無資格再頹廢，
你要發奮，進修增值自己，賺多幾倨錢，用盡方法比你家人、老婆仔女、未婚妻有好既生活。
特別係你老婆或未婚妻，唔好辜負女人寶貴既青春。